ZITTO AKUMBUSHI MKTABA WA BUZWAGI

KARATA ya Kiongozi wa  ACT-Wazalendo, Zitto Kabwe, kwenye ulingo wa siasa Mkoani hapa ilichezwa kwa kumbukumbu ya kuwapigania wanachi wa Kahama kwenye sakata la mkataba tata wa mgodi wa dhahabu wa Buzwagi.

Akiwahutubia wakazi wa mji wa Kahama  kwenye viwanja ya CDT, Zitto alisema wanachi wa mji huo wanayo kila sababu ya kumuunga mkono kwenye harakati za kisiasa kwani aliwapigania bila kujali kuwa yeye ni mbunge wa wapi.

Akizungumza kwa uchungu wakati akieleza namna aliyoshughulikiwa na bunge mara baada ya kupeleka hoja binafsi ya mkataba tata wa mgodi wa buzwagi na serikali ambao alidai kulikuwa na wizi mwaka 2007.

Kabwe, amesema baada ya sakata hilo alizunguka nchi nzima na ndio tukio ambalo hawezi kulisahau na mkoa huo umekuwa wa historia ya kisiasa kwake.

“Misukosuko niliyopata katika ulingo wa kisiasa katika muda wote na hassa mwaka mmoja uliopita umenimfanya niwe na moyo wa chuma wa kuwapigania watanzania, Ujasiri wa kuwapigania watanzania kwangu ulianza wakati wa sakata la Buzwagi mwaka 2007 tukio lililoniweka katika ramani ya wanasiasa makini,” Alisema Zitto.

Alisema pamoja na  kupitia katika misukosuko ya kisiasa ikiwemo kutoungwa mkono na wabunge wenzake na hata kusababisha kusimamishwa kutohudhuria vikao vya Bunge bado alisimama imara na kuhakikisha watanzania wanajua uovu wa iongozi wa serikali ya Chama cha Mapinduzi(CCM).

Aliongeza kuwa kwake Kahama ni mji wa kihistoria kwa kuwa  hoja yake kuhusu mgodi wa Buzwagi ndio imemtangaza kisiasa ambapo kabla ya hapo alikuwa kama mwanasiasa mwingine yeyote nchini.

“Niliwasilisha hoja katika Bunge ya tisa na kulitaka Bunge kufanya uchunguzi wa mapitio ya mikataba ya madini hasa kwa kuundwa Kamati Teule ya Bunge kuchunguza mapitio ya Mikataba ya Madini na mazingira ya kusainiwa kwa mkataba mpya wa madini wa Buzwagi.

Zitto ambaye kabla ya kuacha kuwa mbunge mwezi mmoja uliopita alisema mkataba wa Buzwagi ulisainiwa na  aliyekuwa Waziri wa Nishati na Madini  wa wakati huo Nazir Karamagi, huko Uingereza  Februari 2007.

“Kuletwa kwa hoja hiyo, bila kujali maamuzi ya kuhusu hoja yenyewe, ilikuwa ni ishara tosha ya ukomavu wa demokrasia ndani ya Bunge ila pamoja na yote nilisimama kutetea haki za wana Kahama lakini nikakosa uugwaji mkono.

Zitto ambaye pia aliwahi kuwa Makamu Mwenyekiti wa Kamati ya Bunge ya Hesabu za Serikali (PAC), alisema hatua ya Serikali kusaini mkataba huo mgodi  wa Buzwagi kati ya na Kampuni ya Barrick  alisimama kuhoji sababu za mkataba huo kusainiwa nje ya nchi, London Uingereza.

Alisema pamoja na kutoungwa kwake mkono  bado  asimama kwa ajili ya kutetea Taifa na watu wake ili liweze kunufaika na rasilimali za Taifa ikiwemo kuwekwa kwa mazingira mazuri ya mikataba ya madini ambayo watawanufaida Watanzania wote wakiwemo wanaozunguka migodi ya madini.

Kuhusu madai kuwa ameingia katika Chama cha ACT wazalendo kwa ajili ya kuwaandalia njia watu wengine wagombee Urais Zitto alisema wanaojenga hoja hiyo wameishiwa na mambo ya kusema na kwamba hatahangaika kuwajibu.

Alisema ACT wazalendo wana miiko ya uongozi na kwamba yeyote anayetaka uongozi ndani ya chama hicho atalazimika kufuata miiko hiyo.

“Wanaosema hatuhangaiki nao ila wajue sisi tuna miiko ya uongozi na yeyote atakayekuja ajue kuwa ana wajibu wa kuifuata miiko hiyo ya maadili”alisema Zitto

Kuhusu kugawa kura za wapinzani Zitto, alisema Chama hicho hakipo kwa ajili hiyo bali kazi yake ni kuwatafuta watanzania zaidi ya asilimia 58 walioacha kupiga kura katika uchaguzi uliopita

Alisema katika uchaguzi wa mwaka 2010 waliojiandikisha kwa ajili ya kupiga kura walikuwa watu milioni 20 na kwamba waliopiga kura walikuwa milioni 8.

Zitto alisema ni wakati wa watanzania kuwaunga mkono watu wanaowapigania kimaslahi pasipo kujali anatoka eneo gani la nchi na kwamba maslahi ya Taifa hayana mipka katika kusimamiwa.

Awali Mwenyekiti wa Chama hicho Anna Mghwira, alisema ni jambo la kusikitisha kuona watanzania wanashindwa kusimama katika hoja za kimaendeleo na badala yake wanasimama katika kusikiliza uzushi.

Alisema jukumu la kuhakikisha CCM inaondoka madarakani ni jukumu la watanzania wote na kwamba hakuna chama chenye mamlaka ya kujimilikisha hali hiyo ya kuwapigania watanzania kutoka katika makucha ya kidhalimu.

Katika mkutano huo baadhi ya vijana walijaribu kufanya fujo kabla ya mkakati wao huo kudhibitiwa na wananchi waliojitokeza kwa wingi katika mkutano huo.